.
.
نون النسوة (5)
.
.
"وش" حيلة
اللي حيرته نظره
رِجْـلٍ تاخذه قدام
ورِجْـلٍ تأخره عشره
يا كيف قدرت الأيام
وخلت دروب القلب خضره
شايب وشايل قلب
شُـبّان
وينسى شيبته وسط
هالناس
خطوه تلهمه إحساس
وخطوات ..
يفوق منها على حسره
يا ناعم الخد
شتان ما بيننا شتان
ترميني بنظره ورا
نظره
وانا عاجز عن الرد
وكل ما فُقت من سكره
رميتني بألف سكره
ياليل اطوي سوادك
قمت أعد الثواني عد
والثواني عمر
لا ذابت في عنادك
أمَـنِّي النفس
بالنسيان
وأقول يمكن انساه
بكره
ومر بكره
وبعده ,,
وبعد بكره
وأنا مسجون في نظره
من ورا غطوه
وثقلت الخطوه ,,
والشعر شاب ,,
وهالشايب يظن إنه
شباب
يحتري (نون نسوه)
زحام ,,
والناس مشغوله
وهي ترسل النظره سلام
وهو يثقل عليها
يبي يلعب دور البطوله
نسي إن سيفه خشب
وكفه شايله أوهام
وتعب
ورجلينه ما تقوى
حتى على " سحبة
نعوله"
يا ألف دمعه
على من ياقف حبيبه
بقربه
ولا يقدر يطوله
ليل وزحام وأطفال
ونسوان ومطاعم وأنوار
واصوات
وهو فاقدٍ سمعه
محتار من سؤال
ينزف من العين
بين الكحل والدمعه
إنت ,, معاي ؟؟
نظرتك تلاحقني ؟؟
تلاحق وراي ؟؟
لو هو بهواي
اترك الدنيا واجيك
ألمك ,,
أحطك بصدري واخبـِّـيك
ياااااه ,,
كيف أقدر أزعل العالم وارضيك ؟
يااااااه ,,
كيف لقيت عمري اللي
مضى فيك ؟
ممكن أجهز
"الدله" ,, واناديك ؟
مرت سنين يا رفيقي ,,
ونكهة القهوة ,,,,,
تحتريك
بيننا نظره ,,
وصارت ألف قصه
كني أجمِّع كلام من
جمر وارصه !
باطراف القلب ,,
وبنصه
وانطفت أنوار المكان
وصاروا البشر يسرون
يجمعون العيال
واكياس الأكل وألعاب
نسوان تنادي على بنات
وشباب
وما بقي غير نظره
رغم الظلام ,,
حسيت بدفاها
ومشت ,, راحت
وراحت روحي وراها
..
..
..
الحكاية بكلمتين
كذبة وخيال
محد غيري صدَّقها ,,
وحكاها
.
.
